बझाङ, ५ मङ्सिर/ बझाङ जिल्लाका केही गाविसमा अझै पनि व्यावसायिक रूपमा चरेसखेती गर्ने गरेको पाइएको छ । चरेसखेती गर्न सरकारले प्रतिबन्ध लगाए पनि सम्बन्धित निकायहरूबाट भने नियन्त्रणका लागि केही प्रयास भने भएको छैन । यस वर्षात्र बझाङबाट पाँच क्विन्टल चरेस भारततर्फ गएको यस व्यवसायमा संलग्न ठेकेदारहरूले बताएका छन् । विशेष गरेर जिल्लाका दहबगर, भाम्चौर, सेनपसेला, लेखगाउँ, सुर्मा, ढौलीचौर र काँडा गाविसमा चरेसखेती खुला रूपमा हुने गरेको छ । गत कात्तिक महिनाको दोस्रो हप्तातिर मात्रै लेखगाउँ र सैनपसेला गाविसबाट दुइ क्विन्टल चरेस बिक्री भएको त्यहाँका स्थानीय बासिन्दा युवराज जप्रेलले जानकारी दिनुभयो ।

चरेस व्यापारीहरूले जिल्लाका सबै गाविसबाट चरेस सङ्कलन गरी देउरा र ढुङ्गाङ तथा डडेलधुरा जिल्लाको जोगबुढा गाविसको पैदलबाटो हुँदै लुकीछिपी महाकालीको टनकपुर पुगेर भारतीयहरूलाई चरेस बिक्री गर्ने गरेका छन् । यस वर्षबझाङमा बढी चरेस सङ्कलन भएको एक सुत्रले जनाएको छ । नाम बताउन नचाहने एक चरेस ठेकेदारले टनकपुरमा एक केजी चरेस रु.आठ हजारमा बिक्री गरेको जानकारी दिए । चरेसखेतीबाट राम्रो आम्दानी हुने हुँदा हिमाली भेगतिरका बासिन्दा यसको खेती बढी गर्छन् । चरेसको लोलाबाट रोल्लाको कपडा बुनेर बोल्लो बिक्री गर्न काठमाडौँसम्म यहाँका मानिसहरू जाने गरेका छन् ।