५ मङ्सिर,बुटवल/ विवाहका लागि टीकाटाला गरिसकेको एक युवकले सम्झौता तोड्ने भनेपछि आक्रोशित भएका केटीका आफन्तले केटालाई भकुर्नसम्म भकुरी रु। पाँच लाख दण्डसमेत गराएका छन् । नवलपरासी प्रगतिनगर दलदलेका ३० वर्षीय लालप्रसाद काफ्ले रुपन्देही शङ्करनगरकी एक कन्यासाग यही कात्तिक २५ गते बाँकी जिन्दगीसागै बिताउने उद्घोषका साथ सम्झौता गरेकामा सम्झौता तोड्ने भनेपछि कारवाहीमा परेका हुन् । आक्रोशित केटीपक्षले सो विवाहका योजनाकार अर्थात् लमी ७३ वर्षीय ताराप्रसाद पाण्डेलाई समेत कुटपिट गरी गम्भीर घाइते तुल्याएको छ । घाइते पाण्डेलाई उपचारका लागि काठमाडौं पठाइएको उनका परिवारले जनाएका छन् ।

विगत १५ महिनादेखि अमेरिका बस्दै आएका लालप्रसाद विवाहका लागि केही समयअघि घर आएका थिए ।केटीले शैक्षिक योग्यता ढाँटेको थाहा पाएपछि आफूले विवाह गर्न इन्कार गरेको केटा काफ्लेले बताए । टीकाटालो गर्नुअघि बिएड पहिलो, दोस्रो वर्षको परीक्षा उत्तीर्ण गरेकी छु भनेकी ती केटीले पछि आफै फोन गरी फेल भएको जनाएपछि अन्य उपशङ्का गर्ने अवस्था सिर्जना भएकाले बाध्य भई आफूले विवाह गर्न नचाहेको उनको भनाइ थियो । आफन्तसहित विवाह नगर्ने जनाउदिन लमीका घर पुगेका लालप्रसादलाई केटी पक्षले घेरा हाली कुटेको थियो । सो कुटपिटबाट उनी घाइते भएका छन् ।

केटाले केटीसाग माफीमागी रु.पाँच लाख क्षतिपूर्ति दिने सहमतिपछि तनाव साम्य भएको थियो । इलाका प्रहरी कार्यालयको हाताभित्र दण्ड जरिवानाका रुपमा केटाले तिरेको रु.पाँच लाख केटीपक्षले शङ्कर नगर उच्चमाविको अक्षयकोषमा राख्ने तत्काल घोषणा गरेको थियो । विवाहका लागि भनी आफू अमेरिकाबाट यहाँ आएकामा विनाकसुर कुटाइ खानुपर्‍यो, उल्टै ठूलो राशिको जरिवाना तिर्नु पर्‍यो कस्तो विडम्बना- कुटाइबाट सुन्निएको गाला देखाउँदै केटा काफ्लेले भने ।