पोखरा, १५ मंसिर/नेपाली काँग्रेसका सभापति गिरिजाप्रसाद कोइरालाले सेना समायोजन हुनै नसक्ने दावी गर्दै माओवादी लडाकुको व्यवस्थापन गर्न सकिने बताउनुभएको छ । उहाँले लडाकुको व्यवस्थापन पनि भातृ संगठन वाइसियल विघटन गरेर मात्रै सकिने स्पष्ट पार्नुभयो । वाइसियल विघटन गरेर व्यक्तिगत आधारमा व्यवस्थापन गर्न सकिन्छ । उहाँले आइतबार विहान प्रेस युनियन कास्कीद्वारा आयोजित पत्रकार सम्मेलनमा भन्नुभयो-तर राष्ट्रिय सेनामा भने समायोजन हुनै सक्दैन् । उहाँले माओवादी आफ्ने शब्दजालमा फसेको दोहोर्‍याउँदै संविधान समयमा निर्माण नभए काँग्रेसले नै संविधान निर्माण गरी जनतासमक्ष अनुमोदनको लागि पठाउने जिकिर गर्नुभयो ।

संविधान निर्माण् समयमै नभए काँग्रेस आफैंले संविधान निर्माण गरी जनता समक्ष पठाउने छ । उहाँको भनाई थियो । प्रजातन्त्र विरुद्ध कसैले कुदृष्टि राखे समाप्त हुने चेतवानी दिदैं कोइरालाले प्रजातन्त्रको निम्ति कुनैपनि शक्तिसित नझुक्ने अठोट गर्नुभयो । कोइरालाले काँग्रेसले संघीयताप्रति उठाएको आवाजलाई आफुलाई कुनै जानकारी नभएको बताउनुभयो । प्रजातन्त्र रक्षाको लागि प्रेस स्वतन्त्रको खाँचो समेत उहाँले औंल्याउनुभयो ।