काठमाडाँै, १२ भदौ । परराष्ट्रमन्त्री उपेन्द्र यादव भारतको राजधानी नयाँ दिल्लीमा आयोजना हुने बहुपक्षीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेक)को दसौँ मन्त्रिस्तरीय बैठकमा भाग लिने सिलसिलामा आज अपराहृन त्यसतर्फप्रस्थान गर्नुभयो ।

परराष्ट्र मन्त्रिस्तरीय सो बैठक भोलि बस्नेछ । बैठकमा दक्षिण र दक्षिण-पूर्वी एसियाका परराष्ट्रमन्त्रीहरूको सहभागिता रहने परराष्ट्र मन्त्रालयले जनाएको छ ।

परराष्ट्र मन्त्रालयका प्रवक्ता हीराबहादुर थापाका अनुसार बिमस्टेक बैठकका क्रममा मन्त्री यादवले सप्तकोसी बाँधका कारण उत्पन्न समस्याका विषयमा भारतका परराष्ट्रमन्त्रीसँग छुट्टै भेटघाट गर्नुहुनेछ ।

मन्त्री यादवले भारतीय समकक्षीसँग कोसी बाढीका कारण झन्डै १० किलोमिटर सडक भत्किएर पूर्व-पश्चिम राजमार्ग अवरुद्ध भएकाले भारतीय भूमिको प्रयोग गरी वैकल्पिक मार्ग खुलाउन तथा नेपालमा समस्याका रूपमा देखापरेको चामल र चिनीको सहज आपूर्तिका लागि पहल गर्न वार्ता गर्नुहुने जानकारी पनि प्रवक्ता थापाले दिनुभयो ।