१५ मङ्सिर,काठमाडौं/ पत्रकार जगत जोशीको हत्याको विरोधमा आइतबार कैलालीको धनगढी बजार बन्द गरिएको छ। माओवादी निकट संगठन तथा पत्रकारहरुले दोषीमाथि कारबाही तथा पीडित परिवारलाई उचित क्षतिपुर्तिको माग गर्दै धनगढी बन्द गराएका हुन् । उनीहरुलो अत्तरिया बजारसमेत बन्द गराएका छन् । यसैबीच पत्रकार महासंघको आयोजनामा धनगढीको जिविस चोकमा आइतबार ऐक्यवद्धता सभा गरिएको छ। सभामा महासंघ, प्रेस युनियन, प्रेस चौतारी, क्रान्तिकारी पत्रकार संघलगायतका संस्था सम्बद्ध संचारकर्मीको उपस्थिति थियो । त्यस्तै राजधानीमा पत्रकार हत्याको विरोधमा पत्रकार महासंघले शान्तिपूर्ण र्‍याली आयोजना गर्ने भएको छ।

अपरान्ह २ बजे नयाँ बानेश्वर चोकबाट निकालिने र्‍याली बबरमहलमा पुगी कोणसभामा परिणत हुनेछ । झण्डै दुई महिनाअघि बेपत्ता भएका कैलालीका पत्रकार जगत जोशीको कंकाल शुक्रबार स्थानीय चौकीडाँडामा भेटिएको थियो । सो घटनाबाट पत्रकारको सुरक्षाप्रति राज्य गम्भीर नभएको प्रष्ट भएको भन्दै पत्रकारहरु आन्दोलित भएका हुन् । साथै सोमबार महासंघले देशभर प्रदर्शन गर्ने भएको छ।