१५ मंसिर, नेपालगंज/ सरकारले वार्ताको लागि सकारात्मक भएका समुहहरुसँग नियमित सम्र्पक भइरहेको बताईरहेको वेला जनतान्त्रिक तराई मुक्ति मोर्चा ज्वाला सिंह समूहका अध्यक्ष ज्वाला सिंहले सरकारी पक्षले पछिल्लो दीनमा कुनै सम्पर्क नगरेको बताउनुभएको छ । बाँकेका सिमित संचारकर्मीहरुसँग टेलिफोनमा कुरा गर्दै सिंहले सरकारले वार्ताको लागि पठाएको एउटा पत्र आफूले पाएको र त्यसको जवाफ समेत दिइसकेको तर त्यसपछि दोहोरो सम्वाद नभएको स्पष्ट पार्नुभयो ।

सरकारी पक्षले औपचारिक वार्ताको तयारी गरिरहेको वेला उहाँले सररकारले आफ्नो न्यूनतम् चार सर्त पूरा वार्ता अघि पुरा गर्नै पर्ने बताउनुभयो । सिंह समुहले झुठा मुद्दा खारेज गरी बन्दी रिहाइ गर्नुपर्ने , वार्ता टोलीलाई पूर्ण सुरक्षा दिनुपर्ने , युद्धविराम गर्नुपर्ने र सुरक्षाकर्मीले ग्रामीण क्षेत्रमा जारी राखेको ज्यादतिपूर्ण कार्य रोक्नुपर्ने पूर्व शर्त राखेको छ । तर न्यूनतम शर्तहरु पनि पुरा गर्न सरकारले नचाहेको उहाँको बिष्लेषण थियो । उहाँले सरकारले साना समूहसँग वार्ता गरेर तराईका मुल प्रवाहको आन्दोलनलाई दमन गर्न खोजेको हुनसक्ने आशंका ब्यक्त गर्दै सरकारले अपराधिक समूह भनेकोलाई वार्ताको लागि चिट्ठी पठाएर दोहोरो चरित्र देखाएको आरोप लगाउनुभयो ।

तर केही साना समूहसग गरेको सरकारी वार्ता प्रयासलाई आफुहरुले सकारात्मक रुपमा लिएको बताउँदै आन्दोलनको मुख्य शक्तिलाई सरकारले उपेक्षा गर्नु नहुने बताउनुभयो । उहाँले सैन्य शक्ति विस्तारमा आफ्नो संगठनको ध्यान केन्द्रीत रहेको बताउनुभयो ।