इटहरी, १६ मङ्सिर/ भारतीय आपराधिक गिरोहद्वारा मङ्सिर ९ गते सुनसरी जिल्लाको देवानगञ्ज गाविस, वडा नं. ३ स्थित आफ्नै घरबाट अपहरणमा परेका पाँच बर्षिय बालक रामचन्द्र मेहतालाई रु.दुइ लाख फिरौती तिरेर आफन्तले हिजो अपराहृन मुक्त गरेर ल्याएका छन् । आफन्त दाजु नाता पर्ने राजु मेहताले सो रकम तिरेर भारतको सहर्साजिल्लाको शीतलमाडी भन्ने गाउँबाट भाइलाई अपहरणमुक्त गर्न सफल भएको उनले बताए ।

घरमा आमासँगै सुतिरहेका बालक रामचन्द्रलाई भारतीय आपराधिक गिरोहले नाटकीय ढङ्गबाट अपहरण गरेर भारत सहर्साजिल्लाको दुर्गम गाउँमा राखेको भन्ने सुराकीका आधारमा प्रहरीसमेतको सक्रियतामा अपहरणमुक्त गर्न सकिएको पनि राजु मेहताले जानकारी दिए । बालक रामचन्द्रलाई भारतीय आपराधिक गिरोहले पैसाकै लागि अपहरण गरेको र बारम्बार अज्ञातस्थलबाट फिरौती रकम माग गर्ने गरेको पनि आफन्तहरूले बताएका छन् ।