१२ भदौ, बिहार/ भारतीय प्रधानमन्त्री मनमोहन सिंहले सप्तकोशीको बाढीबाट भएको बिहारको क्षति राष्ट्रिय बिपत्ति भएको प्रतिक्रिया दिनुभएको छ । उहाँले आज बिहार क्षेत्रको हवाई निरिक्षणको क्रममा बिहार राज्य सरकारलाई एक हजार करोड रुपैया नगद र सवा लाख टन अन्न सहयोगको घोषणा गर्नुभयो । उहाँले आज बिहारको बाढी प्रभावित क्षेत्रको हवाई निरिक्षण गर्दैहुनुहुन्छ । सप्तकोशीको बाढीले बिहारको १५ जिल्ला प्रभावित भएको छ । प्रभावित १५ जिल्लामध्ये रुपौल,सहरसा,अररीया र मधेपुरा अति प्रभावित रहेको छ । बाढीबाट बिहारको २० लाख जनसंख्या प्रभावित भएको र लाखौ मानिस घरबारबिहिन भएका छन । पछिल्लोपटक नौ जनाको मृत्युभएपछि बाढीबाट मर्नेहरुको संख्या त्यहा ५५ पुगेको छ ।
नेपालतर्फको बाँध फुटेर दुइ सय बर्ष अघिको बाटोमा सप्तकोशी बग्न थालेपछि त्यहाको बस्ती क्षेत्रमा उठीवास लागेको हो । भारतीय समाचार संस्था पिटिआईले बिस्थापितहरुले रेल्वे स्टेशनहरु लगायत बिभिन्न सार्वजनिक भवनहरुमा शरण लिईरहेको उल्लेख गरेको छ । त्यसैगरी अझै दशौ हजार जनता बाढीमा फसिरहेको तथा उद्धारको प्रतिक्षा गरिरहेको तर खराव मौसमको कारण सेनाको हेलिकोप्टरलाई राहत-उद्धारको लागि कठिनाई भएको बताईएको छ । हिजो मात्र बिहारका मुख्य मन्त्री नीतिशकुमारले भारतीय प्रधानमन्त्री मनमोहन सिंहलाई भेटी एक हजार करोड रुपैया र एक लाख टन खाद्यान्न सहयोगको माँग गर्नुभएको थियो ।