पोखरा, १२ भदौ/श्रीलंकाको सिलोन उद्योग बाणिज्य संघका प्रतिनिधी चन्द्रारत्ना भिथाङ्गीले श्रीलंकामा हुने सम्मेलनबाट नेपाली उद्यमीहरुले सूचनाप्रविधी र खाद्य उत्पादनमा नयाँ सीप सिक्नसक्ने बताउनुभएको छ । आउँदो अंग्रेजी वर्ष २००९ को फेब्रुअरी २७ र २८ तारिखका दिन श्रीलंकाको राजधानी कोलम्बोमा आयोजना हुने दक्षिण युरोप तथा दक्षिण एसिया खाद्य तथा सूचना प्रविधि सम्मेलनको बारेमा जानकारी दिदैं उहाँले उक्त अभिव्यक्ति दिनुभएको हो ।
सम्मेलनमा सहभागि भएका २५ प्रतिशत दक्षिण एसियाली उद्योगहरुसँग युरोपियन उद्योगहरुको सहकार्य गराउने, नयाँ बजारको खोजी गर्ने तथा दक्षिण एसियाली ब्यवसायीहरुलाई युरोपेली उद्योगहरुसँग गहिरो साइनो गास्ने वातावरण पनि सम्मेलनले दिने उहाँले दाबी गर्नुभयो । उहाँका अनुसार सम्मेलनमा दक्षिण एसियाका १ सय २० र युरोपका ६० वटा कम्पनीको सम्मेलनमा सहभागिता रहने छ । नेपालका ३० वटा उद्योग सहभागिता बताइएको छ ।
दक्षिण एसियामा रहेका सूचना प्रविधी र खाद्य उद्योगहरुलाई आफ्नो क्षमता अभिबृद्धि, खाद्य प्रशोधन तथा प्रविधी आदानप्रदान गर्न सहयोग पुर्‍याउने उदेश्यले सो कार्यक्रमको आयोजना गरिन लागेको भिथाङ्गीले जानकारी दिनुभयो । नेपाल उद्योग बाणिज्य महासंघ, युरोपियन युनियने सिलोन उद्योग बाणिज्य संघको सहयोगमा पोखरामा बिहीबार सम्मेलनको बारेमा जानकारी दिन गोष्ठीको आयोजना गरिएको थियो ।
कार्यक्रम तथा पोखरा उद्योग बाणिज्य संघका अध्यक्ष दीपक श्रेष्ठले सूचना प्रविधी तथा खाद्य उद्योगको क्षेत्रमा कार्यरत पोखरेली ब्यवसायीहरुलाई सम्मेलनमा सहभागी बन्न आग्रह गर्नुभयो । विकसित देशको प्रविधी नेपालमा भित्र्याउन सके नेपाली उद्योगको प्रतिस्पर्धी क्षमतामा अभिबृद्धि हुने उहाँको भनाई थियो । सम्मेलनमा सहभागी हुन चाहनेले एक हप्ता भित्र पोखरा उद्योग बाणिज्य संघको सचिवालयमा सर्म्पर्क राख्न पनि उहाँको आग्रह थियो ।
पोखरा उद्योग बाणिज्य संघका प्रथम उपाध्यक्ष मानकाजी माकाजुले पोखरा उद्योग बाणिज्य संघले प्रविधी हस्तान्तरण सम्बन्धी मार्कोपोलो परियोजनासँग सफलतापुर्वक कार्य गरेको स्मरण गर्दै नयाँ प्रविधीले सिक्नको लागि सम्मेलन फलदायी हुने विश्वास ब्यक्त गर्नुभयो । कार्यक्रममा पोखरा उद्योग बाणिज्य संघका महासचिव कृष्णमोहन श्रेष्ठले सूचना प्रविधीको जानकारी बिना उद्योगहरु प्रतिस्पर्धी हुन नसक्ने धारणा राख्नुभएको थियो ।